Илон Маск, основачот и извршен директор на Тесла, реагираше за сомнежите на Бил Гејтс во врска со одржливоста на електричните камиони.

Најновата „војна“ меѓу милијардерите се случи викендов кога тој остро реагираше на коментарите на коосновачот на Мајкрософт.

Маск очигледно е револтиран од неодамнешната објава на блогот „GatesNotes“ на 24 август, во која Гејтс пишува за големиот напредок што е постигнат кај електричните возила. Гејтс објаснува дека батериите стануваат поевтини и дека зголемената конкуренција ќе создаде поголем проблем при изборот на потрошувачите. Но, дури и ако опцијата за патување на кратки релации се развие во опција за подолги патувања „веројатно никогаш нема да биде практично решение за големите товарни камиони, бродови или патнички авиони“.

Гејтс објаснува дека проблемот е во тоа што батериите се големи и тешки и „Колку повеќе тежина сакате да пренесете, толку повеќе батерии ќе ви бидат потребни за напојување на возилото. Но, колку повеќе батерии користите, толку повеќе тежина додавате – а за тоа ќе ви треба повеќе енергија… Електричната енергија функционира кога станува збор за кратки растојанија, но ни треба поинакво решение за тешки, долги возила“.

Ова воопшто не му се допадна на Илон Маск, па ја прокоментира изјавата на Гејтс преку Твитер, одговарајќи на прашање од еден корисник. Иако неговиот одговор беше сосема краток – „Тој нема поим“, предизвика лавина коментари на оваа социјална мрежа.

He has no clue

— Elon Musk (@elonmusk) September 12, 2020

Ова не е прв пат Маск да има негативни забелешки за Бил Гејтс.

Во февруари, Илон коментираше дека неговиот разговор со најбогатиот човек на светот е неинспиративен.

Несогласувањата почнаа откако Гејтс во едно интервју спомена дека купил електрично „порше тајкан“, а не „тесла“.