Министерството за финансии во понеделник и вторник во Скопје ја организира Првата годишна конференција „Економско заздравување и раст по Ковид“ во рамки на „Економски и финансиски форум“.

Конференцијата ќе ја отворат министерот за финансии, Фатмир Бесими и претседателот на Владата, Зоран Заев, по што ќе се одржат две панел-дискусии на коишто високи претставници треба да ги претстават своите видувања на темата, а нивните излагања треба да дадат одговори на клучни прашања – како можат политиките најдобро да го поддржат растот; кои се главните предизвици за одржување на безбедноста во светот што се менува; кои фискални и монетарни мерки им помогнаа на бизнисот и на работните места; како и кои се ризиците од предвременото повлекување на фискалните стимулирачки мерки.

Покрај претставниците од Владата, домашни екепрти и амбасадори во нашата земја, на панел дискусиите во текот на два дена ќе учествуваат Ана Бјерде, потпретседател на Светска банка за Европа и Централна Азија, Ендру Вајт од Оксфордскиот универзитет, министрите за финансии на Косово и на Албанија, Хекуран Мурати и Анила Дена, потпретседателот на ЕБРД Јурген Ригтеринг, извршниот директор на Конституенцата во ММФ, Пол Хилберс, директорот на СБ за РС Македонија, Масимилијано Паолучи, регионалниот директор на МИГА за Европа и Централна Азија, Олга Шловскаја, постојаната претставничка на УНДП во РС Македонија, Нарине Сахакјан и Ролф Вензел, гувернер на Развојната банка на Советот на Европа.

Оваа конференција треба да ги постави темелите и во иднина да прерасне во конференција со традиција и силно влијание во регионот и во Европа, велат од Министерството за финансии.