Двајца крушевчани, од кои едниот бил кандидат за градоначалник, ќе одговараат за изборен поткуп откако, според полицијата, пред првиот круг на локалните избори давале пари во замена за гласови.

Интересен е соодносот на парите кои тие наводно им ги дале на гласачи – кандидатот им поделил по 1.000 денари на четворица сограѓани-мажи, а другиот поткупувач, тврди полицијата, потрошил 5.000 денари за гласот на само една жена.

„ОВР Прилеп поднесе кривична пријава против Т.Х.(33) и Т.Ш.(36), двајцата од Крушево, поради постоење основи на сомнение за сторени кривични дела „поткуп при избори и гласање“ и „помагање“. На 14.10.2025, првопријавениот дал поткуп во износ од по 1.000 денари на четири лица да гласаат за него како кандидат за градоначалник на општина Крушево, додека второпријавениот на едно женско лице дал поткуп од 5.000 денари со истата намера“, соопшти МВР.