Нови правила за транспарентност за моделите за вештачка интелигенција (ВИ) за општа намена како ChatGPT и Gemini стапија на сила денес низ цела Европска Унија, како дел од значајниот закон за вештачка интелигенција донесен минатата година.

Според новите правила, програмерите мора да откријат како функционираат нивните модели и кои податоци биле користени за нивна обука, објавува Хина.

За особено напредните модели, кои се сметаат за потенцијални ризици за јавноста, безбедносните мерки исто така мора да бидат документирани.

Вештачката интелигенција за општа намена се однесува на системи што можат да се користат за широк спектар на цели, како што се генерирање текст, анализа на јазик или пишување код.

Законот делумно е наменет за подобра заштита на авторските права.

Програмерите сега мора да ги пријават изворите на нивните податоци за обука и дали користеле автоматско собирање податоци од веб-страници, како и да ги наведат чекорите преземени за заштита на интелектуалната сопственост.