Властите во проруските региони во Украина ги објавија првите резултати од гласањето за отцепување
Проруските власти во четирите украински области објавија дека според првичните резултати од референдумот, по пребројани 20 до 27 отсто од гласовите гласачите со огромно мнозинство одлучиле за приклучување кон Русија, пренесуваат руските агенции.
Во сите четири региони – Луганск, Доњецк, Херсон и Запорожје, меѓу 96 и 98 отсто од гласачите гласале „за“ припојување кон Русија на референдумите, кои меѓународната заедница ги осуди и најави дека нема да ги признае. Податоците за толку високи гласови за анексија се засноваат на 20 до 27 проценти од гласовите, јавуваат агенциите Риа Новости, Тасс и Интерфакс, пренесува АФП.
По региони: 97% од гласачите во Херсон, 98% во Запорожје, 98% во Доњецк и 98% во Луганск гласале за отцепување од Украина.
Западните медиуми проценуваат дека кога ќе се пребројат сите гласови, поддршката за приклучување кон Русија ќе изнесува околу 80 до 90 проценти. По ова, сепаратистите треба да поднесат официјално барање до рускиот претседател Владимир Путин за приклучување на територијата на Русија.
Четирите региони сочинуваат околу 15 отсто од Украина, а заедно имаат територија приближно со големина на Португалија.