Претседателот на СДСМ, д-р Венко Филипче, денеска презентираше анализа на изборната програма „Платформа 1198“, по повод две години од Владата на Христијан Мицкоски. Според СДСМ, анализата покажува дека најголем дел од ветувањата на ВМРО-ДПМНЕ не се реализирани и дека граѓаните не го добиле најавениот подобар живот.

— По две години граѓаните не добија ни повисок стандард, ни поквалитетен живот, ниту подобри услови за живот, ниту, пак, пофункционални институции. Не ги добија ветувањата на Мицкоски и на ВМРО пред изборите. Едноставно, граѓаните се излажани — порача Филипче.

Тој рече дека резултатите од анализата се поразителни и дека, според СДСМ, по две години од мандатот на актуелната влада се исполнети само мал дел од ветувањата.

— Имено по две години од мандатот на оваа влада реализирани се само околу 10 отсто од ветувањата. Деведесет отсто од ветувањата дадени пред две години не се исполнети. Практично ништо — истакна Филипче.

Според лидерот на СДСМ, најголемиот неуспех на Владата е во економијата и во животниот стандард, области што, како што рече, биле меѓу клучните ветувања на Мицкоски пред изборите.

— Денеска, наместо зголемен животен стандард, стандардот е намален во споредба од пред две години. Граѓаните живеат полошо и потешко, паричниците и фрижидерите се попразни — рече Филипче.

ВИДЕОИНТЕРВЈУ | Кристина Костова: Во СДСМ се потребни реформи, но не само козметички

Тој оцени дека граѓаните наместо повисоки плати и подобри услови за живот се соочуваат со растечка сиромаштија, високи цени и со намалени инвестиции.

— Наместо зголемен стандард, работниците добија зголемена сиромаштија. Наместо зголемување на странските инвестиции, странските инвестиции се намалени за речиси две третини — посочи Филипче.

Филипче додаде дека по две години владеење, Владата на Мицкоски нема резултати во клучните области, а последиците, според него, секојдневно ги чувствуваат граѓаните.

— Остварените резултати се една голема нула. Во реформи, во животен стандард, во плати, во мерки за млади, поддршка за земјоделци, за наставници, за лекари, едноставно нула за европскиот пат — порача претседателот на СДСМ.

Претседателот на СДСМ оцени и дека по две години власт на Владата на Христијан Мицкоски, наместо повисок стандард, поголеми инвестиции и пониска инфлација, граѓаните се соочуваат со поскапувања, сиромаштија и „намалени странски инвестиции за една третина“.

Филипче тврди дека институциите се партизирани, а тендерските скандали „покажуваат дека нема вистинска антикорупциска борба“.

Тој обвини дека младите се оставени без мерки за образование, домување, работа и перспектива, поради што сè повеќе размислуваат за иселување од земјата.

Кога Мицкоски прозива, сите молчат и ракоплескаат