Влада: Иницирана поголема транспарентност и отчетност на државните органи и ЈП во државна сопственост

Владата прави конкретни чекори кон поголема транспарентност и отчетност на органите на управување на централно и на локално ниво, за граѓаните да бидат што е можно поинформирани за трошењето на финансиските средства од буџетот, но и за добивање на што е можно поквалитетни и поефективни услуги за граѓаните, соопшти денеска владината прес-служба.

На последната, 40-та владина седница, на предлог на Комисијата за економски систем и тековни економски политики, со која претседава вицепремиерот за економски прашања Фатмир Битиќи, е усвоен заклучок со кој е наложено на агенции, на дирекции, на фондови, на бироа, на совети, на акционерски друштва или други правни лица во државна сопственост да ја зголемат транспарентноста и отчетноста во нивното работење.

На седницата е заклучено сите финансиски извештаи (тромесечни, полугодишни и годишни) што се доставуваат на разгледување во владина постапка, нема да бидат разгледани, доколку листата од 22 обврзувачки информации и документи согласно Законот за слободен пристап до информации од јавен карактер не бидат објавени на веб страните на предлагачите, согласно Стратегијата за транспарентност на Владата на Република Северна Македонија.

Од владината прес-служба потсетуваат дека претходно, на 26-та седница што се одржа на 7 декември лани, на предлог на вицепремиерот за борба против корупција, одржлив развој и човечки ресурси, Љупчо Николовски, е усвоена информација во таа насока. Со неа се задолжуваат сите министерства, освен министерствата за одбрана и за внатрешни работи, органите во нивен состав, самостојните органи на државната управа, самостојните државни органи кои одговараат пред Владата, јавните претпријатија основани од Владата, акционерските друштва во државна сопственост, како и другите иматели на информации кои одговараат пред Владата во рок од 30 дена од усвојувањето на оваа информација на своите веб-страници да ги објават документите и информациите наведени во членот 10 од Законот за слободен пристап до информации од јавен карактер.

На истата седница Владата им препорача и на општините, на Град Скопје и на општините во Град Скопје, како и на имателите на информации основани од нив, во рок од 30 дена на своите веб-страници да ги објават документите и информациите кои се предвидени во членот 10 од Законот за слободен пристап до информации од јавен карактер. Ова, појаснуваат од Владата, ќе биде еден од условите за општините, градот Скопје и општините во градот Скопје да користат финансиска поддршка за реализација на проекти, со средства од  централниот буџет и средства од меѓународните донори.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот