На 6 и 7 јуни, на падел терените лоцирани кај СЦ „Јане Сандански“, ќе се одржи третото издание на „Party & Padel“, кој воедно важи и за првиот падел турнир организиран во Македонија.

Настанот ќе започне во 11 часот со загревање организирано од Реформер студио, додека падел натпреварите стартуваат во 12 часот. Оваа година учество ќе земат 24 екипи кои ќе се натпреваруваат за награден фонд од 40.000 денари, од кои 25.000 денари се наменети за победничката екипа, а 15.000 денари за второпласираните.

Покрај спортскиот дел, „Party & Padel“ нуди и богата забавна програма. За музичката атмосфера ќе бидат задолжени четири диџеи – Ана Даниловска (DJ Aya), Андреј Савиќ (DJ Savikj), DJ Зоки Бејбе и DJ Иван Димитриев. Посетителите ќе можат да уживаат и во коктели, крафт пива, матча пијалаци, разновидна храна, како и поп-ап штандови на локални бизниси.

Главната цел на настанот е промоција на дружењето преку спортот, но и дополнителна афирмација на паделот, спорт кој во последните години бележи огромен раст низ Европа и светот.