Моника Зец, дизајнер, мајка, претприемач од Скопје, е инспиративна жена што води три успешни бизниси, едуцирајќи млади мајки на своите социјални платформи преку текстови (блогови) и видеа (влогови).

Разговаравме за мајчинството за кое вели дека ја „ресетираше“ и, секако, за нејзината прва бизнис-приказна.

– Мојот прв бизнис буквално го отворив на клупа додека ја доев ќерка ми. Таа беше бебе од три месеци и реков, тоа е тоа, ставам тука линија, пресекувам и почнувам.

Моника почнала да ги купува производите што ѝ недостасувале и така ја добила идејата тоа да го прошири во бизнис, почнувајќи од производи како цуцли, креветчиња и слично.

Шест години подоцна, таа има и успешен бизнис што се вика „Кидс енд Ко“.

– Сега увезувам премиум скандинавски производи за бебиња, ги продавам тука, како официјален дистрибутер и увозник за брендовите „Муши“ и „Фриг“.

Моника не крие дека нејзините бизниси се продолжение на нејзиниот начин на живот.

– Она што го работам е екстензија на мене, на мојот лајфстајл, моите потреби, мојот начин на живеење… Сите мои улоги се спојуваат – мајка, дизајнер, жена што се грижи за себе – објаснува таа.

Како жена што има многу улоги, Моника верува дека токму тие улоги можат да ја направат една жена среќна или потполно исцрпена.

– Секоја жена носи безброј улоги во само 24 часа – вели таа.
– И да, сите прашуваат: Како балансираш помеѓу мајчинството и работата? А јас велам — баланс не постои. Не балансирам. Живеам.