„Lora’s sushi“, „гоуст кичен“ е кујна без локација или простор за јадење која е наменета за подготовка на суши. Приказната започнува многу години наназад, кога за првпат Славчо Темелковски и Лора Јовеска подготвувале суши дома, кој наивно прераснува во голем и успешен бизнис.

Славчо е дипломиран економист, а Лора е медицинска сестра, но двајцата се основачи на „Lora’s sushi“. Тие се пример за перфектна симбиоза во еден успешен бизнис.  Лора е таа која го подготвува сушито, а маркетингот и бизнисот го води Славчо. Покрај тоа, тие имаат детски работилници за изработка на суши и едукација за кинеската култура.

– Јас и мојот партнер Славчо, уште пред пет-шест години почнавме да си правиме суши за нас, потоа почнавме да ги викаме нашите блиски, и така дојде до тоа да започнам со тој бизнис. Неколку години правевме дегустација на ориз, на сосови, со цел да дојдеме до вистинските вкусови. Правевме некои пресметки и дојдовме до тоа дека може нашето суши да биде достапно за сите – објаснува Јовеска.

Темелковски вели дека почетокот воопшто не бил лесен и морале да се донесат ризични одлуки.

– Во моментот кога требаше да започнеме со бизнисот, Лора веќе беше вработена како лаборант и беше принудена да ја напушти работата – објаснува Темелковски.

Нивната цел била да креираат квалитетен бренд со прифатлива цена кој ќе биде наменет за секого.

– Реално, за да одиш да јадеш суши неколкупати неделно во рестораните во Скопје е скапо – додава Темелковски.

За „Слободен печат“ Славчо објасни дека суши култрата во Македонија уште е синоним на жива храна. Но, поради тоа, тие креираа селектирано мени кое ќе биде достапно за сите клиенти.

– Главната работа што ја направивме во тоа селектирано мени, беше фактот дека ниедно суши што го нудиме, не е со жива риба – вели Темелковски за „Слободен печат“

Нивниот бизнис веќе прерасна во успешен бренд кој и преку социјалните медиуми ги едуцира младите, а и постарите да бидат креативни и да прават суши дома.