Првиот ден од месецот мај, се прославува како Меѓународен ден на трудот. Овој ден е посветен на борбата за правата на работниците. Меѓународниот ден на трудот се празнува и одбележува во повеќе земји во светот. До 2006. година во Македонија, овој празник се прославувал два дена – на 1 и 2 мај, а од 2007. година до денес се прославува само на 1 мај. Карактеристични за овој ден се протестите на синдикатските здруженија. Оваа година Сојузот на синдикатите на Македонија ќе одржи протест, а голем дел од граѓаните овој ден ќе го искористат како ден за одмор, правејќи пикник или скара.

„Слободен печат“ направи анкета во која ги праша граѓаните дали знаат зошто не се работи на први мај, што се случило на овој ден, и како планираат да го поминат овој ден.

Сите анкетирани беа запознаени со тоа што се случило на први мај и зошто се одбележува и празнува овој ден.

-Тоа е долга приказна. Мислам дека има случај од Чикаго, во 1880 и некоја година, работниците од Чикаго се креваат на протест, за да изразат незадоволство поради неподносливи услови за работа и слично. Таму се брутално загушени на тој протест. Тие работници се омалуважувани, носени по судски процеси и така натака, дури некои се и погубени. Мислам дека, кратко после тој датум, глобално е проширен денот први мај, како празник на работникот, како еден вид да отпор против феудалното однесување кон работникот, и за среќа ден денеска се празнува тоа – рече еден од анкетираните.

Дел од нив споделија и како планираат да го поминат времето овој четврток.

– Ќе бидам во Скопје, така што ќе излезам на протест, а потоа ќе одам на скара – изјави едно момче за „Слободен печат.“