Двајца ученици и двајца возрасни луѓе загинаа денеска при судир меѓу воз и училишен минибус во Бугенхут во Белгија, пренесува Би-би-си.

„Моите први мисли се со жртвите“, изјави белгискиот министер за мобилност Жан-Лук Крук, кој ги потврди извештаите дека рампите на железничкиот премин биле спуштени во моментот на несреќата.

Минибусот превезувал седум деца, возач и придружник во моментот на судирот.

Портпаролката на федералната полиција Ен Бергер изјави дека несреќата се случила кратко по 8 часот по локално време.

Таа за ВРТ изјави дека никој од патниците во возот не бил повреден, иако едно лице било третирано за шок.

„Минибусот бил на пат кон специјално училиште. Станува збор главно за ученици од средно образование“, додаде таа.

Како што пишуваат локалните медиуми, минибусот се превртел во малиот град во близина на Аалст, северозападно од белгискиот главен град Брисел.

„Шокантни вести. Моите мисли се со сите жртви, нивните семејства и сите директно засегнати“, напиша министерот за образование Зухал Демир на социјалните мрежи.