Кинез е уапсен оваа недела со повеќе од 2.000 живи градинарски мравки во багажот на главниот аеродром во Најроби, бидејќи случаите на шверц со инсекти се зголемуваат во Кенија.

Кинескиот државјанин Жанг Кекун, 27, е уапсен на меѓународниот аеродром Џомо Кенијата во вторникот додека се обидуваше да ја напушти земјата, според судските документи што  Ројтерс ги виде денеска. Службениците за имиграција издадоа забрана за патување на пасошот на Жанг откако тој избегна апсење во Кенија минатата година.

Љубителите на мравки плаќаат големи суми пари за одржување на колонии во големи проѕирни контејнери, познати како формакариуми, кои буквално им даваат увид во сложените социјални структури и однесувања на видот.

Минатата година, четворица мажи беа казнети со по 7.700 долари за обид за извоз на илјадници мравки вредни за екосистемот на Кенија, во случај за кој експертите велат дека означува промена во биопиратството од плен како слонова коска кон помалку познати видови.

Полицијата соопшти дека при претресот на багажот на Жанг се пронајдени 2.238 мравки, вклучувајќи 1.948 во епрувети, а останатите во три ролни „мека ткаенина“.

Полицијата соопшти дека Жанг бил во Кенија две недели и идентификувал тројца соучесници кои му ги снабдувале мравките.

Службата за диви животни во Кенија му рекла на судот дека ѝ е потребно повеќе време за да ги заврши истрагите, вклучително и испитување на „ајфонот“ и „макбукот“ запленети од Жанг.

Службата за диви животни соопшти дека слична пратка мравки од Кенија била запленета во Бангкок во вторникот, што укажува на широко распространета и организирана мрежа за шверц.