Сан Антонио Спарс продолжи со серијата победи и во изминатата вечер славеше над Детроит пистонс со 114:103.

Виктор Вембањама повторно беше клучна фигура со 21 поен, 17 скокови и шест блокади, додека Девин Васел уфрли 28 поени. Спарс така стигнаа до деветтата победа во низа која за нив е најдолга оваа сезона и на Западот заостануваат само зад актуелниот шампион Оклахома.

Тимот од Тексас фуриозно го отвори мечот со водство од 14:2 и најави дека и ова ќе биде нивна вечер. Иако Пистонс успеаја да се вратат и по првата четвртина да имаат предност од три поени, домаќините брзо ја презедоа контролата со прецизни удари за три поени. Во последната четвртина Сан Антонио ги постигна првите седум поени и дојде до двоцифрена предност што не ја испушти до крајот.

Кај Детроит се истакна Џејлен Дурен со 25 поени и 14 скокови, во својот втор настап по отслужената суспензија од два натпревара изречена од НБА лигата. Ајзеа Стјуарт сè уште ја издржува својата суспензија поради тепачката за време на натпреварот во Шарлот претходно овој месец.

Ѕвездата на Пистонс, Кејд Канингем, имаше тешка вечер и промаши 21 од 26 шута и средбата ја заврши со 16 поени и 10 асистенции.

Тензиите кулминираа во втората четвртина кога Канингем направи прекршок во напад, оттурнувајќи го бекот на Спарс, Стефон Касл. Крилниот играч на Сан Антонио, Келдон Џонсон, реагираше и го оттурна Канингем, по што Дурен му впери прст во лицето. По видео-проверката, Џонсон и Дурен добија технички грешки.

Пистонс, кои претходно имаа серија од пет победи и се лидери на Источната конференција, во среда ќе ја пречекаат Оклахома во нов сериозен тест. Истата вечер, Сан Антонио ќе гостува кај Торонто, а на 5 март повторно ќе го пречека Детроит на домашен терен.