НАСА ја лансираше мисијата „Артемис II“, првиот лет со екипаж до Месечината по повеќе од половина век. Четворица астронаути полетаа од Флорида на 10-дневно патување околу Месечината, објави Би-би-си.

Ракета од системот за вселенско лансирање (SLS) со капсула „Орион“ беше подигната од вселенскиот центар „Кенеди“ во Флорида, со екипаж од тројца американски астронаути и еден Канаѓанец: Рид Вајзман, Виктор Гловер, Кристина Кох и Џереми Хансен. Мисијата ќе им овозможи на астронаутите да го тестираат „Орион“ во реални вселенски услови, вклучувајќи рачна контрола и маневрирање во орбитата, како и изведување серија научни и инженерски експерименти.

„Одиме за целото човештво“, рече астронаутот Рид Вајзман при лансирањето.

Неколку часа подоцна, астронаутите се во орбита на Земјата и спијат. Наредните 24 часа се клучни за мисијата и ако нема никакви проблеми, до следната вечер тие треба да тргнат кон Месечината. НАСА сподели дека астронаутите имале проблем со тоалетот, но набрзо потоа открија дека проблемот е решен.

Тие објаснија дека ова е тест мисија, па се очекуваат разни проблеми кои секако ќе ги решат.

„Артемис II“ претставува прв човечки лет како дел од програмата „Артемис“, која беше лансирана во 2017 година со цел да се воспостави долгорочно човечко присуство на Месечината и да се подготват за идните мисии на Марс. Програмата ги наследува мисиите „Аполо“, од кои последната, „Аполо 17“, заврши во декември 1972 година, оставајќи празнина од повеќе од половина век во човечките мисии на Месечината.

Планирано е првите луѓе да се вратат на Месечината со мисијата „Артемис 4“ во 2028. Откако во минатото се натпреваруваа со Советскиот Сојуз, САД во изминатите години се фокусирани на конкуренцијата од Кина, која брзо ја развива својата вселенска програма и планира да испрати луѓе на Месечината во 2030 година.

Неколку часа по полетувањето, горната фаза на ракетата „СЛС“ успешно се одвои од капсулата „Орион“ и нејзиниот погонски модул. Потоа екипажот започна да работи на рана пробна цел: рачно управување со вселенското летало околу горната фаза за да се демонстрира неговата способност за маневрирање доколку неговите стандардни автоматизирани контроли некогаш откажат.

Екипажот е „безбеден, сигурен и во одлично расположение“, вели официјален претставник на НАСА – тие нема да слетаат на Месечината за време на нивната 10-дневна мисија, но планираат да ја обиколат и би можеле да патуваат подалеку од Земјата отколку што некој досега бил.

Во првите 24 часа по полетувањето, леталото ќе кружи околу Земјата, при што екипажот двапати ќе тестира различни системи.

Целата мисија можете да ја следите во живо на јутјуб-каналот на НАСА.