ВИДЕО | Успешна акција на НП Шар Планина и Зоолошката градина на Скопје: Ослободија мечок заглавен во сајла околу десет часа
Успешна акција на вработените од НП Шар Планина и Јавната Установа Зоолошка градина на град Скопје која никого нема да остави рамнодушен. Во бачило на жител од шарпланинското село Бозовце, вработените ослободија мечок кој бил заглавен во сајла околу 10 часа. Мечокот како што пишува во објавата на НП Шар Планина бил изморен и исплашен, а по 3 часовна акција успешно ослободен.
Установите за заглавениот мечок биле информирани од сопственикот на бачилото.
„Мечките се строго заштитени жители на Шар Планина, а локалното население од планинските села живее во соживот со природата. Упатуваме благодарност до сопственикот на бачилото кој го пријави настанот за да се ослободи мечокот.Благодарност и до полициските службеници за напорите да го обезбедат теренот, како и до сите други надлежни институции со кои се координираше акцијата,“, велат од установата Шар Планина.
Се зачестија случаите на симнување на мечките до населените места и бачилата на Шара, најверојатно во потрага по храна.
На Фејсбук страната Село Бродец пред еден месец се појави снимка на која се гледа како мечка го бара своето мече во брзите води на реката Пена која поминува на десетина метри од куќите на селото.
Жители на Бродец велат дека мечката со мали мечиња постојано го „посетува селото“ и се доближува на десетина метри до првите куќи.
ВИДЕО: Кај селото Бродец на Шара, мечка скока во Пена за да го спаси мечето од брзите води на реката