Алекс Џенкинсон (39) од Сафолк е обвинет за упатување закани кон Ендрју Маунтбатен-Виндзор за време на инцидент во близина на неговиот дом на кралскиот имот Сандрингем во Норфолк. Според полицијата во Норфолк, мажот бил уапсен во средата, набргу по 19:30 часот, по извештај за недолично однесување во селото Волфертон.

Маунтбатен-Виндзор бил нападнат од маж со фантомка додека ги шетал своите кучиња. Тој успеал да побегне до својот автомобил заедно со своето обезбедување. Инцидентот се случил во близина на имотот „Марш Фарм“ (Marsh Farm), каде што тој се преселил по напуштањето на „Ројал Лоџ“ во Виндзор.

Џенкинсон се соочува со две точки од обвинението за користење заканувачки, навредливи или погрдни зборови и однесување со намера да вознемири или предизвика страв, како и за одбивање да даде примерок од крв во притвор.

Во однос на неговиот статус, изворот наведува дека кралот Чарлс Трети му ги одзел титулите на крајот на минатата година. Поточно му било одземено правото да биде принц и му била одземена титулата војвода.

Ваквите одлуки биле донесени поради неговата поврзаност со покојниот сексуален престапник Џефри Епстајн, иако Маунтбатен-Виндзор постојано негира каква било вина.