Американскиот претседател Доналд Трамп на својата социјална мрежа „Трут соушл“ објави видео направено со вештачка интелигенција, во кое е прикажан како лекар што им препишува „терапија“ на своите политички противници и критичари.

Во видеото, Трамп носи бел лекарски мантил и стетоскоп, а „пациентите“ се јавни личности кои во изминатите години отворено ја критикуваа неговата политика и администрација. Меѓу нив се актерите Роберт Де Ниро, Едвард Нортон и Џулија Робертс, како и актерките и водителки Рози О’Донел и Вупи Голдберг.

Во една сцена, верзијата на Роберт Де Ниро создадена со вештачка интелигенција вели дека поради противењето на Трамп „не можел да јаде, не можел да спие и ги правел несреќни сите околу себе“.

Видеото се потпира на изразот „Трампов синдром“, односно ТДС, термин што Трамп и неговите поддржувачи често го користат за, како што велат, „неразумната омраза“ кон неговите политики. Во снимката, Трамп тврди дека не бил сигурен дали ќе може да им помогне на лицата што страдаат од ова измислено нарушување.

Во сатиричниот „план за лекување“, верзијата на Трамп создадена со вештачка интелигенција препорачува „исклучување на лажните вести“, молитва и пиење диетална кока-кола како начин за ублажување на наводните симптоми.

На видеото реагираше Рози О’Донел, која порача дека нејзиниот став кон Трамп не се променил. Таа го нарече американскиот претседател „сериозно болен“ и повторно повика на примена на 25. амандман од американскиот Устав, кој предвидува постапка за утврдување неспособност на претседателот да ја извршува функцијата.

Од Белата куќа соопштија дека станува збор за дел од препознатливиот политички и комуникациски стил на претседателот. Портпаролот Дејвис Ингл изјави дека Трамп има право да објавува вакви содржини на своите профили на социјалните мрежи.

Трамп не мора да ги враќа отстранетите експонати за ропството, одлучи американски суд