Дрита Ислами се најде на последното место во трката на 400 метри со пречки во квалификациите на Европското првенство во атлетика кое се одржува во Минхен, Германија.

Резултатот на македонската атлетичарка е 1:01.56 мин. што е далеку послабо време од нејзиниот личен рекорд кој е воедно и македонски рекорд, 57.53 секунди.

Преку социјалните мрежи се огласи нашата натпреварувачка која вели дека има тешка сезона.

– Борејќи се со повреди цела сезона и пред две недели повторно имав Ковид, по вторпат оваа година, па дури и не се чувствував доволно конкурентна, решив да трчам и да го дадам најдоброто од себе на ЕП, но она што го научив е дека морам да обрнам внимание на моето здравје на прво место. Сега се фокусирам на 2023 година и да имам убав почеток следната сезона – напиша Ислами на Фејсбук.

Со овој настап на Ислами заврши учеството на нашите атлетичари на ова ЕП, во понеделникот во маратонската трка настапи и Дарио Ивановски, но не успеа да ја заврши трката.