Сиромаштијата посебно детската е повеќедимензионална и вклучува повеќе фактори како недостиг од образование, економските потешкотии, недостигот на љубов и грижа, насилството во домот и недостигот од слободни активности.

-Сиромаштијата во државава постои. Пред се како системска грешка, а не како личен избор, посебно не на децата. Постои недостаток на системски решенија како и подетално разбирање на проблемот, посебно на детската сиромаштија. Постојат два аспекти во дефинирање на сиромаштијата, едниот е перцепцијата на сиромаштијата, вториот недостатокот на креирани политики. За сиромаштијата не се виновни родителите туку системот. Сиромаштијата не е личен неуспех. Потребно е да функционира системот, кога некој ќе влезе во сиромаштија, системот да му помогне и да излезе од неа, вели д-р Бојан Србиноски, од Фајнанс Тинк.

Тој нагласи дека сиромаштијата се мери преку монетарни мерила, но не секогаш таа мерка е релевантна и добро пресликува што се случува во сиромаштијата, додава професорот.

-Првиот аспект за мерење на сиромаштијата е доходот како средство да се оствари некоја цел. Се утврдува праг на доход и се под него се води како сиромаштија, но тоа е комплекен проблем. Потребно е прво да знаеме што е сиромаштијата и да ја разбереме нејзината комплексност, потоа да ги вградиме мерките со кои располагаме како репер како ќе ги диктираме политиките, односно да се вгради во институциите ваквото мерење. Но нашиот интерес е целта, објаснува д-р Србиноски.

Тој зборуваше за сиромаштијата во руралните и во урбаните средини, како и според етничката припадност во државава.

-Најсиромашни се источниот и југоисточниот регион, а по нив доаѓа скопскиот и полошкиот регион. При пресметките на сиромаштија тука е вклучен и интензитетот на сиромаштија. Во полошкиот регион,на пример имаме поинтензивна сиромаштија во одредени случаи. Интересно е во резултатите кои ги добивме нема поголема разлика во руралните и урбаните средини, расликата е тоа што таа се базира на различни аспекти, вели за УБ Д-р Бојан Србиноски од Фајнанс тинк.