Голем инцидент го одбележа финалето на Европското младинско првенство во бокс што се одржуваше на Златибор, Србија. Македонскиот судија Стефан Цубалевски беше физички нападнат од тренерот на азербејџанскиот боксер Јусуф Агакишијев.

Инцидентот се случи во финалниот меч во категоријата до 75 килограми, каде што силите ги одмерија Агакишијев од Азербејџан и српскиот претставник Виктор Мајсторовиќ. Тренерот на Азербејџанецот прво бурно реагираше вербално на одлуките на судијата, а потоа влезе во рингот и физички го нападна Цубалевски кого го давеше и го удираше, пред очите на публиката во која имаше и многу деца.

Борбата веднаш беше прекината, а азербејџанскиот боксер дисквалификуван. Златниот медал му припадна на српскиот боксер Виктор Мајсторовиќ. Инцидентот фрли сенка врз спортскиот дух на настанот и предизвика бројни реакции во спортската јавност.