Неколку стотици кумановци, кои со години работеле во американски бази во Ирак и Авганистан, денеска излегоа на протест пред просториите на Управата за јавни приходи (УЈП) во градот, за да го изразат револтот од тоа што сега добиваат пресметки и решенија за ретроактивно оданочување на приходите од странство за 2020 година.

Тие нагласија дека „не бегаат од даноци“, но оти сега се соочуваат со неприфатливи барања за ретроактивно плаќање на даноци за пет години наназад, кога дел од заработеното веќе е потрошено или вложено дома – во куќи, кредити и бизниси – а роковите за плаќање се кратки и со закана од камати и извршители.

Учесниците на протестот велат дека данокот од платите им бил задржан односно платен во земјите каде што работеле, преку фирмите што ги ангажирале, па барањето од УЈП го доживуваат како двојно, па дури и тројно оданочување. Дел од демонстрантите јавно посочија дека добиле решенија со обврски од неколку илјади евра само за 2020 година и дека не може да се очекува ваков трошок да се сервисира „во еден здив“, особено кога постапката доаѓа во празничен период.

Во Куманово, според нивните проценки, засегнати се околу 4.000 луѓе. Граѓаните најавија дека нема да плаќаат додека не ги исцрпат сите правни механизми, а бараат и повеќе време за обезбедување документација што треба да покаже каде и како бил платен данокот.

Од Управата за јавни приходи, пак, велат дека станува збор за законска обврска која одамна постои, но сега се применува поорганизирано, и дека целта не е „полнење на буџетот“, како што тврдат кумановци кои протестираат. УЈП порачува дека повиците и известувањата служат за појаснување и утврдување на фактичката состојба, а граѓаните кои веќе платиле данок во странство нема да бидат двојно оданочени, бидејќи постојат механизми како даночен кредит и примена на договори за избегнување двојно оданочување.

Над 9.000 граѓани треба да платат данок за приходи од странство, УЈП извади тефтер од 2020 година