ВИДЕО | Што се случува со Мел Гибсон? Актерот снимен како се движи со помош на бастун
Актерот Мел Гибсон неодамна беше снимен во јавност како се шета со помош на бастун и ортопедска чизма.
Имено, актерот отишол на вечера со својата ќерка Лусија во ресторан во Малибу, каде се појавил со ортопедска чизма придржувајќи се за бастунот. Како што пишува „Дејли мејл“, најверојатно тој се повредил за време на снимањето на филмот „Смртоносно оружје 5“.
Актерот, кој неодамна го прослави својот 68. роденден, за лежерната пригода облекол сиви панталони, карирана кошула и сина јакна. На ногата без ортопедско помагало носел папуча. Ќерката Лусија, која Гибсон ја доби со руската музичарка Оксана Григориева, за вечерата со нејзиниот татко облекла панталони со празнични мотиви и широк џемпер .
Медиумите ги контактирале неговите претставници за коментар, но сè уште не добиле одговор како дошло до повредата на актерот.
Инаку, Гибсон во 2021 година потврди дека ќе биде во главната улога на филмот „Смртоносно оружје 5“, но и дека ќе биде задолжен за режијата. Во тоа време, тој рече дека сака да му оддаде почит на оригиналниот режисер, покојниот Ричард Донер, кој го напиша сценариото и требаше да го режира пред неговата смрт.