Барселона со победа од 3-1 над Реал бетис го затвори последниот домашен натпревар сезонава, а каталонскиот гигант испиша и историја во шпанскиот фудбал.

Барселона ја завршува сезоната со неверојатен учинок од 19 победи на исто толку натпревари на домашен терен, нешто што досега не му успеало на ниту еден клуб во формат на лига со 20 екипи.

Последен пат тим со максимален ефект дома имал Реал Мадрид во сезоната 1985/86, но тогаш првенството се играло со 18 клуба. Каталонците и претходно двапати имале совршен домашен биланс, во сезоните 1958/59 и 1959/60, кога лигата броела 16 екипи.

Што се однесува до самиот натпревар, домаќините поведоа во 28. минута преку Рафиња, а со минимална предност од 1-0 се замина и на паузата. Во продолжението, истиот фудбалер повторно се запиша во листата на стрелците и во 62. минута зголеми на 2-0. Гостите успеаја да се вратат во игра седум минути подоцна кога Иско реализираше пенал за 2-1.

Сепак, дилемите околу победникот ги разреши Жоао Кансело, кој во 74. минута со прецизен удар ги постави конечните 3-1 за ново славје на Барселона пред своите навивачи.