Мериет Мекфарланд од Лондондери, Ирска, која дури неодамна научила да користи компјутер, ја доби својата диплома по англиска книжевност на 90-годишна возраст — речиси 70 години откако се откажала од нејзините првични студии, пренесува Би-би-си.

– Не можев да поверувам, и ми требаше прилично долго време – рекла таа.

Деведесетгодишната жена беше најстарата од повеќе од 300 дипломирани студенти на церемонијата на Отворениот универзитет (Open University) во Белфаст во вторникот. А, нејзината приказна е приказна за одлучност, трпение и мала помош од пријателите, туторите и семејството.

Мекфарланд првично почнала универзитет во Даблин во 1960-тите, но љубовта се испречила пред да ги заврши студиите. Таа се откажала од студиите и наместо тоа се омажила.

Иако ѝ требале неколку години, таа одлучила повторно да студира со Отворениот универзитет додека се опоравувала од сообраќајна несреќа.

– Имав малку слободно време и си помислив дека сакам да направам нешто – изјавила  Мекфарланд.

Студирањето онлајн понекогаш се покажувало како предизвик. Сепак, таа рекла дека нејзиното семејство – вклучувајќи ги нејзините четири деца, внуци и правнуци, многу ѝ помогнало.

– Многу сум лоша со интернетот, но имав голема помош од семејството – рекла таа, додавајќи дека нејзината снаа ја научила да пишува на тастатура.

– Знам дека се тука ако ги побарам и ми помагаат на секој можен начин. Но, знаете, мислам дека сметаат дека е малку чудно баба да има диплома! – додала таа.

Мекфарланд, исто така, реkla дека имала „прекрасен“ тутор кој ѝ пружил „многу поддршка“.

Нејзината најстара ќерка, Шона Гејли, ја придружуваше нејзината мајка на церемонијата на дипломирање во салата „Вотерфол“.

– Јас сум толку горда на неа. Таа е дипломиран студент, комплетна, на 90-годишна возраст, тоа е толку возбудливо за неа и за сите нас. Отсекогаш жалеше што не ги завршила студиите на Тринити Даблин, сите го знаевме тоа, но имаше четири деца, имаше напорен живот и сè друго – рекла Гејли.

Гејли рекла дека нејзината мајка навистина се посветила на студиите.

– Седеше на својот кауч, опкружена со купишта книги, со нејзиниот лаптоп и таблет пред неа – се присетила таа.

Целото семејство дошло во Белфаст „на голем семеен ручек“, пред да го гледаат нејзиното дипломирање. А, Мериет има порака за секој што мисли дека е премногу стар за да научи нови работи: „Ако можам јас, секој може. Никогаш не е доцна.“