Црногорската Агенција за заштита на животната средина соопшти дека организира потера по младенче лав, кое му побегнало на сопственикот, турски државјанин, во Будва кон крајот на јануари, пренесуваат медиумите во Црна Гора и во регионот.

Во поканата испратена до граѓаните се наведува дека утре, пред седиштето на Агенцијата во Подгорица, ќе се организира транспорт до Будва за да се пребара теренот и биолозите да го лоцираат и фатат младенчето лав. Учеството во акцијата е на доброволна основа. Во потрагата по лавчето ќе се користи и дрон.

Како што се наведува, лавот, доколку биде пронајден, ќе биде сместен во привремено живеалиште пред да се најде трајно решение.

„Тој лав е малечок, но тие растат брзо и за два, три месеци, ќе почне да јаде кучиња, мачки, луѓе и ситуацијата е прилично сериозна“, изјави Дарко Савељиќ од Агенцијата за заштита на животната средина.

Кон крајот на јануари, црногорските медиуми објавија дека младенче лав избегало од дворот на странски државјанин кој го чувал животното како домашно милениче.

Полицијата тогаш соопшти дека се работи „на утврдување на околностите како младенче лав во сопственост на странски државјанин воопшто влегло во Црна Гора“.

Полицијата започна локална потрага по животното, но безуспешно.