Актерот Драган Спасов – Дац и пејачот Александар Митевски се музичко дуо кое уште од 2019 година успешно ја освојува публиката со својата музика. Нивната соработка започна со песната „Цреши охридски“, по што следеше големиот успех на баладата „Уште ми фалиш“. За време на пандемијата со коронавирусот, дуото ја објави и веселата „Корона чао“, а во меѓувреме нивниот репертоар се збогати со уште дваесетина песни кои редовно се пеат на нивните настапи низ Скопје и низ Македонија.

Во саботата, Дац и Александар настапија во познат ресторан во Кавадарци, заедно со пејачката Маја Гроздановска – Панчева. Пред публиката тие приредија музичка вечер исполнета со евергрини и добро расположение.

Особено внимание привлече гестот на дуото за време на настапот. Имено, тие одвоија време да им запеат и на вработените во кујната на ресторанот, кои во тој момент биле на работна смена. На видео објавено на нивниот инстаграм-профил се гледа како Александар Митевски им приоѓа, им пее и лично ги поздравува.

„Кога тие се на смена и имаат работа, ние доаѓаме кај нив да им ја исполниме музичката желба. Поздрав до кујна и целиот колектив на ресторанот“, стои во описот на видеото.

ВИДЕО | Дац и Александар изненадија млад брачен пар: Влетавме на свадба