Поранешниот готвач на принцезата Дајана, Дарен Мекгрејди на социјалните мрежи откри дека принцезата обожавала лосос и го сподели рецептот за нејзиното омилено јадење со лосос.

Според видеото кое го сподели Мекгрејди на Јутјуб, таа обожавала лосос печен во тава со макадамски ореви, коријандер и кора од лимета, а послужено со динстан зеленчук и благо зачинет мајонез од шрирача.

– Толку многу го сакаше лососот што го јадеше три пати неделно и ми било тешко постојано да смислувам различни јадења, за секогаш да сервирам само лосос на скара – објасни тој во видеото, додавајќи дека овој рецепт за лосос бил еден од нејзините омилени.

Како се подготвува

За да го подготвите ова јадење, загрејте ја рерната на 180 °C. Во меѓувреме, ставете една лажица маслиново масло во тава, зачинете четири измиени филети од лосос со сол и црн пипер и ставете ги во тавата. Печете додека не добијат златна боја. Потоа, во блендер, измиксирајте ги макадамските ореви, коријандерот, стопениот несолен путер, панко презлата (можете да користите и обична), жолчката од јајце, кората и сокот од лимета, солта и црниот пипер за да ја направите смесата за кора. Ставете четвртина од смесата врз секое филе и добро притиснете. Ставете ги подготвените филети во рерна и печете 10 минути, додека кората не почне да добива кафеавкаста боја. Додека се пече лососот, пропржете малку црвен кромид и црвена пиперка, додадете малку мед и прелијте со многу свеж сок од портокал и гответе додека течноста не се намали. Ставете ја смесата од кромид и пиперки на чинии и ставете ги филетите од лосос врз неа. Сервирајте топло со малку мајонез од шрирача и малку зелена салата.

Протеините се едни од клучните и витални хранливи материи за човечкото тело. Тие ги градат, ги обновуваат и ги одржуваат ткивата како што се мускулите, кожата и органите. Покрај тоа, тие го поддржуваат производството на ензими, хормони и антитела, што е од суштинско значење за имунитетот и правилното функционирање на органите воопшто. Исто така помагаат во зголемувањето на силата и контролата на телесната тежина, обезбедувајќи подолготрајно чувство на ситост, а исто така го поддржуваат и здравото стареење бидејќи го спречуваат губењето на мускулната маса. Веројатно ова се причините зошто дури и принцезата Дајана обрнувала големо внимание на соодветниот внес на протеини.