Една црна мечка ја чекаше непријатно изненадување кога влезе во куќа во Ванкувер, Канада, и наиде на неочекуван противник – храбар померанец со тежина помала од три килограми.

Домашната безбедносна камера го сними неверојатниот момент кога млада црна мечка влезе низ отворена врата во дневната соба, љубопитно се погледна наоколу и го помириса каучот, непосредно пред да се соочи со миленичето.

Откако се приближи до чинијата со храна на Скаут, малиот померанец истрча од другата соба, залаја кон мечката и успешно ја избрка. Неговата сопственичка, Кајла Клајн, тргна по него, викајќи му да се врати, но на следната снимка се гледа како мечката трча по скалите во градината, а Скаут сè уште го следи, лаејќи цело време.

„Се втрчав кон дворот, а тој веќе го бркаше преку оградата. Мечката беше од другата страна, а Скаут сè уште лаеше кон него“, изјавила гордата сопственик за канадскиот „Глобал њуз“.

Очигледно кучето Скаут, се налути затоа што мечката му го изеде појадокот.

„Бев изненадена, но може да биде страшен кога ќе се налути, па можам да го замислам како оди со полна брзина кон мечката“, додала Клајн.

Таа истакнува дека мечките повремено минуваат низ областа, но дека досега никогаш не се случило некоја да влезе во куќата. Таа исто така вели дека веројатно ќе ја држи вратата затворена во иднина, но дека сè уште го има Скаут да ја заштити неа и нејзиното семејство.

„Тој има неверојатен карактер… Бев толку горда на него, беше толку храбар“, заклучила сопственичката на Скаут.