Денеска во својот трет натпревар кошаркарите на Пелистер пред мечот можеби ја имаа фаворитската улога против Широки Бријег со оглед на тоа што битолчани славеа во првите два натпревари оваа сезона во АБА2 лигата. Но, Босанците кои пак стартуваа со два порази во натпреварувањето, дојдоа до победата славејќи со 83:73.

Иако водеше македонскиот претставник по првото полувреме (40:38), следуваше пресврт на противникот добивајќи ги третата и последната четвртина со 22:18 и 23:15.

THE END: @hkk_siroki score their 1st win of the season as they beat Pelister-Bitola. #ABALiga2 pic.twitter.com/sTCxQCOih2

— NLB ABA League 2 (@ABA_League2) November 23, 2022

Битолчани имаа сосема добро отворање на натпреварот. За нешто повеќе од пет минути имаа двојно повисоки (16:8). Но, во оној втор дел од четвртината не успеаја и да ги задржат во целост. Имаа „само“ 25:22, откако погоди Мустафица.

Во втората четвртина, Широки успеа да направи и резултатски пресврт. Да поведе со 36:33, но не и нешто повеќе од таа разлика. До истекот на првото полувреме битолчани најдоа начини да го вратат водството, макар истото било и минимално (40:38).

Во продолжението, Широки беше екипата која се стекна со повисока разлика. И тоа од осум поени (60:52) како што беше во 29 минута. Пелистер се врати, за кратко време, намалија битолчани на достижни 58:60 на истекот на тој дел од играта.

А во одлучувачката четвртина не се снајдоа баш најдобро. Никако не успеваа да направат уште една промена во водството. За Пелистер доминираше Босанецот Хаџифејзовиќ с0 20 поени, од друга страна Широки го имаше одличниот Брзоја (27 поени), кој го имаше на сите делови од теренот, и беше вистинска напаѓачка енигма за „зелено-белите“ кои го запишаа првиот неуспех во три одиграни мечеви од новата сезона во АБА 2 конкуренцијата.

На табелата Пелистер е на шестото место со пет бодови, додека Широки Бријег е на деветтата позиција со четири.