Партизан останува во игра за титулата во АБА лигата откако вечерва пред своите навивачи славеше убедлива победа над Дубаи со 84-70 во третиот натпревар од финалната серија.

„Црно-белите“ одиграа одлично уште од самиот почеток и со цврста одбрана и расположена офанзива брзо го наметнаа својот ритам. Доминантната прва четвртина им донесе предност од 23-10, која подоцна се покажа како клучна за конечниот исход.

Гостинскиот тим во следниот период успеа да биде рамноправен противник, а втората и третата четвртина донесоа многу поизедначена игра. Сепак, Дубаи не најде начин сериозно да ја загрози предноста на белградскиот состав, кој во последниот дел сигурно ја контролираше ситуацијата на теренот и стигна до заслужен триумф.

Најрасположен во редовите на Партизан беше Бруно Фернандо со 15 поени и седум скока. Значајна улога имаше и Карлик Џонс, кој натпреварот го заврши со 13 поени и седум асистенции.

Во составот на Дубаи се истакнаа Дејвис Бертанс и Мфионду Кабенгеле, кои постигнаа по 17 поени. Бертанс притоа реализираше пет удари за три поени, додека Кабенгеле покрај поентерскиот ефект запиша и девет скока.

Со оваа победа Партизан го намали заостанувањето во финалната серија на 2-1 и ја продолжи борбата за шампионскиот трофеј во регионалното натпреварување.

ВИДЕО | Mногу емоции во Белград: Партизан се прости од Един Авдиќ пред неговата сопруга и синот, цела сала скандираше