Партизан ја одбрани шампионската титула во Србија, но финалната серија против Војводина заврши во хаотична атмосфера и со сериозен инцидент.

Вториот натпревар од финалето беше прекинат по нешто повеќе од 14 минути игра, при резултат 6-5 за Војводина, откако навивачите на Партизан употребија пиротехнички средства.

Според информациите, топовски удар експлодирал во непосредна близина на теренот, со што била загрозена безбедноста на ракометарите и останатите присутни во салата. По инцидентот, двете екипи се повлекоа во соблекувалните, а полицијата интервенираше за да ја стави ситуацијата под контрола.

По околу дваесетина минути, ракометарите на Партизан се вратија на теренот, но играчите на Војводина одбија да го продолжат натпреварот. Поради тоа мечот не беше доигран, а по повеќе од еден час неизвесност, Партизан официјално беше прогласен за шампион.

Се очекува бурна реакција од таборот на Војводина по ваквите случувања. Партизан во првиот натпревар славеше победа со 33-27.