Во една од неговите последни објави на Фејсбук, Кирил Поп-Христов – Кили низ песна како да ја раскажува својата животна приказна и она што го чувствувал во моментот.

Актерот, кој почина пред неколку дена во Еквадор на 58 години, во октомври лани се снимал во својот двор, и пред да ја запее песната, тој вели:

„Не се може веќе, брате. Е, што е многу-многу е. Востанието чека многу долго. Дами и господа, одиме“, рече Кили, а потоа запеа импровизирана песна на српски јазик во која вели:

„Востание се спрема. Ова е војна која мораш да ја добиеш, ова е битка која мораш да ја освоиш. Ова е војна која ја војувам сам со себеси. Крајно време беше, животот те чека, во ритам на лелекање“, е дел од песната на Кили во која тој неколкупати ја споменува битката која мора да се добие.

Инаку, Кирил Поп-Христов – Кили ќе биде погребан во Еквадор, земјата во која помина значаен дел од својот живот. Неговото почивалиште ќе биде во Мангларалто, покрај океанот, откри за „Викимедиа.мк“ неговата сопруга, кореографката и професорка по современ танц Гордана Деан Поп-Христова.

Откако во 2014 година се преселија во Еквадор, Гордана и нивната ќерка Јоана, која се омажи таму и роди син, повеќе не се вратија во Македонија. Кили, пак, неколкупати доаѓаше во Скопје, па повторно се враќаше во Еквадор.

Роден е на 30 јули 1967 година во Скопје, каде што го поминал и поголемиот дел од својот живот и професионална кариера.

Дипломирал на Факултетот за драмски уметности во Скопје на Универзитетот „Св. Кирил и Методиј“, на отсекот за актерска игра, во класата на проф. Љубиша Георгиевски, во 1989 година. Од 1993 до 2014 година работел во МНТ, а во 2018 година повторно се вратил на истата сцена, оставајќи значаен белег во институцијата како дел од актерскиот ансамбл.

ФОТО | Познатите се збогуваат со Кили: „Ах, бре, будалче!“