Кој беше Кирил Поп Христов – Кили?
Познатиот македонски актер Кирил Поп Христов-Кили почина во средата на 58-годишна возраст во Еквадор. Тој се пресели во јужноамериканската држава во 2014 година со семејството, сопругата Гордана и ќерките. И покрај преселбата, повремено се враќаше во Скопје и одржуваше контакт со пријателите и колегите од театарската и филмската сцена.
Препорачано
Заминувањето на Кили – мултиталентираниот глумец, музичар, уметник во секоја смисла на зборот и фигура каква што ретко се среќава во современата македонска култура воопшто, бездруго е голема загуба. Колегите и публиката ќе го паметат како посветен актер, кој со својата работа и со блескавата надареност остави длабока трага во македонскиот театар, во филмот и на телевизијата.
Кирил Поп Христов е роден на 30 јули 1967 година во Скопје, а поголемиот дел од животот и актерската кариера ги помина во родниот град.
Тој дипломирал на Факултетот за драмски уметности во Скопје, на Универзитетот „Св. Кирил и Методиј“, на отсекот за актерска игра во класата на проф. Љубиша Георгиевски, во 1989 година. Од 1993 до 2014 година работел во МНТ, а во 2018 година повторно се вратил на истата сцена, оставајќи значаен белег во институцијата како дел од актерскиот ансамбл.
Поп Христов во текот на тие две децении настапи во многубројни претстави и соработуваше со познати режисери и актери, градејќи препознатлив актерски стил.
Кили важеше за еден од највпечатливите современи македонски актери, а многу реплики од неговите ликови се паметат и денес, навлезени во секојдневниот говор.
Публиката ќе го памети по улогите во филмовите „Тетовирање“, „Бал-кан-кан“, „Збогум на 20-тиот век“ и „Панкот не е мртов“, како и по значајните театарски улоги во претставите „Ричард Трети“, „Злосторство и казна“, „Ревизор“, „Народен пратеник“, „Ослободување на Скопје“ и други драмски дела. Тој остави трага и во телевизиската продукција со улогите во „Трст виа Скопје“, „Бумбари“ и „Досие Скопје“.
Покрај актерската работа, Кирил Поп Христов беше и композитор на музиката за филмот „Судијата“ (2002), на режисерката Жанета Вангели.
На социјалните мрежи сопругата на Кили, кореографката Гордана Деан Поп Христова, објави емотивни фотографии од нив двајца. Многубројни колеги и пријатели емотивно се збогуваа со Кили.
View this post on Instagram
Последно збогум од МНТ: „Денеска се простуваме од нашиот Кили“
