ВИДЕО: Моќниот Бразил ја преслуша Јужна Кореја, во четвртфиналето дуел со Хрватска
Фудбалската репрезентација на Бразил денеска на стадионот „947“ ја совлада селекцијата на Јужна Кореја со 4:1 (4:0) во осминафиналето на Светското првенство во Катар.
Головите за Бразил ги постигнаа Винисиус Јуниор во седмата минута, Нејмар во 13 минута, Ришарлисон во 29 минута и Лукас Пакета во 36 минута. Стрелец на единствениот гол за Јужна Кореја беше Паик Сеунг-хо во 76. минута.
Бразил уште од првата минута воспостави темпо кое противникот не можеше да го следи. Шансите се редеа една по друга, Винисиус Јуниор искористи една во седмата минута и му донесе водство на својот тим. Бразилците имаа поголем посед на топката и се чинеше дека играта се одвива само околу шеснаесетникот на Јужна Кореја. По прекршокот над Ришарлисон во шеснаесетникот и досудениот пенал, Нејмар без проблеми беше прецизен од белата точка за 2:0.
Brazil progress to the Quarter-finals! 🇧🇷@adidasfootball | #FIFAWorldCup
— FIFA World Cup (@FIFAWorldCup) December 5, 2022
Новиот гол за Бразилците го постигна Ришарлисон во 29 минута по одличната акција на тројца бразилски играчи, по што остана сам пред голманот кого рутински го матираше. Во слична ситуација во 36 минута се најде Лукас Пакета, кој исто така беше прецизен за 4:0.
Второто полувреме Бразилците го отворија исто како и првото, само што јужнокорејскиот тим беше поагресивен во одбраната, па Бразилците не добија лесно шанса за шут. Јужна Кореја имаше поголем посед на топка поради опуштената игра на Бразилците кои лесно ја губеа топката.
Во 76 минута Паик Сеунг-хо шутираше од далечина и само го ублажи поразот на азиската селекција.
До крајот на мечот немаше промена на резултатот. Репрезентацијата на Бразил во четвртфиналето на Светското првенство ќе се сретне со селекцијата на Хрватска која претходно ја елиминираше Јапонија.