Манчестер Сити направи неочекуван кикс во финишот од сезоната додека е во борба за место во Лигата на шампионите. Избраниците на Пеп Гвардиола одиграа само 0-0 на гостувањето кај веќе испаднатиот Саутемптон, што може скапо да ги чини во завршницата на шампионатот.

На „Сент Мери“, актуелниот шампион настапи како апсолутен фаворит и доминираше во сите статистички сегменти со над 25 удари кон голот на домаќините, но без ефект. Саутемптон го издржа притисокот и успеа да освои бод кој на табелата не им значи ништо.

Највозбудлив натпревар од попладневната програма беше одигран во Лондон, каде што Евертон славеше со 1-3 на гости кај Фулам. „Карамелите“ покажаа карактер, иако домаќините поведоа преку Хименез, следуваше одлична реакција: Миколенко, Кин и Бето со што режираа пресврт.

Победи забележаа и Брентфорд и Брајтон. Брентфорд минимално славеше на гости кај Ипсвич со 0-1, благодарение на погодокот на Шаде во 18. минута. Брајтон пак беше посигурен на свој терен, совладувајќи го Вулверхемптон со 2-0.