Легендарниот воз „Шпанец“, кој со години беше запоставен и речиси целосно отпишан, повторно се враќа на македонските железници. Директорот за влеча и одржување на возните средства и член на Управниот одбор на „Македонски железници-Транспорт“, Игор Коруновски, на социјалните мрежи објави видео од тест-вожбата на целосно обновениот и модернизиран воз.

Како што соопшти Коруновски, возот е целосно реновиран и опремен со нов дизајн, телевизори, озвучување, алармни системи и видео-надзор, со цел да се обезбеди поудобно и побезбедно патување за патниците.

„Легендарниот воз ‘Шпанец’, некогаш заборавен и речиси отпишан, се враќа на голема врата. Денеска го тестиравме целосно обновениот и модернизиран воз“, напиша Коруновски на Фејсбук, додавајќи дека подготовките се во полн ек и дека во наредниот период следуваат уште новости.