Еден од најдобрите кошаркари на сите времиња, Леброн Џејмс, забележа 28 поени, 12 асистенции и 10 скока во победата на Лос Анџелес лејкерс од 124:104 над Далас маверикс, станувајќи најстариот НБА играч со трипл-дабл во еден натпревар.

Во својата 22 сезона во НБА лигата, Леброн Џејмс постави уште еден рекорд. На 41 година и 44 дена, „Кралот“ стана најстариот играч со трипл-дабл во победата на домашните Лејкерси над Далас.

Потребата за големи бројки и влијание врз играта произлезе од отсуството на повредениот Лука Дончиќ, кој е исто така под знак прашалник за Ол-стар натпреварот.

Во триумфот на „езерџиите“ Руи Хачимура постигна 21 поен, Остин Ривс постигна 18, а Џексон Хејс имаше 16 поени.

Гостите од Тексас дојдоа без повредениот Купер Флег, па најголемиот товар за постигнување поени падна врз Макс Кристи и Наџи Маршал кои запишаа по 19 поени, П.Џ. Вилијамс имаше 18, а Брендон Вилијамс 17.

Лејкерси влегуваат во краткиот одмор на петтото место на Западот со учинок од 33-21, додека Далас е на 12 место со (19-35).

НБА лига, резултати:

Оклахома – Милвоки 93:110
Јута – Портланд 119:135
ЛА Лејкерс – Далас 124:104