Британскиот музичар и поранешен фронтмен на „Дајр стреитс“ (Dire Straits), Марк Нопфлер, продава голем дел од својата колекција гитари на аукција во Лондон, а дел од приходите ќе бидат наменети за хуманитарни цели, пишува „Ројтерс“.

Колекцијата, која вклучува некои од најзначајните гитари од 50-годишната кариера на Нопфлер, е изложена во аукциската куќа „Кристи“ пред продажбата на 31 јануари.

– Тоа е прекрасна колекција од 122 предмети на Марк Нопфлер што ја опфаќа целата негова кариера… – изјави Кери Кин, стручен советник за музички инструменти на аукциската куќа.

Црвената гитара Schecter Telecaster од 1983 година користена за снимањето на хитот на Dire Straits „Walk of Life“ и вклучена во придружното музичко видео се проценува на 4.000 до 6.000 фунти (4.669 до 7.000 евра).

Реизданието на Gibson Les Paul Standard ’59 од 1983 година, користена за песната „Money for Nothing“, во која се наоѓа еден од најпознатите гитарски рифови на Нопфлер, се проценува на 6.000 до 8.000 фунти.

Од аукциската куќа „Кристи“ велат дека оригиналната верзија на Gibson Les Paul од 1959 година, користена од Нопфлер за настапи во 2000-тите, најверојатно ќе ја достигне највисоката цена на продажбата, со проценка од 300.000 до 500.000 фунти.

„Тоа е навистина посебен винтиџ инструмент кој сам по себе, без оглед на Марк Нопфлер, е многу вреден“, вели Амелија Вокер, специјалист за приватни и култни колекции на аукциската куќа, која ја предводи продажбата.