Ракометната репрезентација на Македонија утре од 18:00 часот ќе го отвори Европското првенство во Германија и тоа со натпревар против моќната Франција.

Овој натпревар е посебен и историски затоа што ќе се игра на фудбалски стадион и на него ќе може да присуствуваа 55.000 гледачи, а воодушевувањето што ќе имаат можност да бидат дел од ваков спектакл не го криеа македонските голмани, Марко Кизиќ и Мартин Томовски.

Двајцата се едногласни дека утрешниот натпревар е историски.

„Сите сме навистина шокирани, ова ќе биде историски натпревар. Атмосферата е преубава и на празна сала, а сигурно дека ќе биде прекрасно и кога ќе биде исполнета. Со нетрпение го очекуваме натпреварот. Втор ден сме во Германија, и навистина сме повеќе од мотивирани за тоа што не очекува утре“, изјави Кизиќ.

„Прекрасно чувство, навистина сме изненадени. Чест и задоволство ќе ни биде да играме на овој стадион. На натпреварот против Франција ќе се пишува историја, а на нас ни останува да уживаме и достојно да ја претставиме Македонија“, дополни Томовски.

Натпреварот се игра во терминот од 18:00 часот.