Кети Пери успеа да ги насмее обожавателите со шега за време на настапот на Џастин Бибер, на фестивалот Коачела, кој се одржа во саботата во Калифорнија. Додека 32-годишниот пејач дел од настапот помина зад лаптоп, пребарувајќи ги сопствените песни на Јутјуб, нејзиниот коментар од публиката брзо се прошири на социјалните мрежи.

Во видеото, Пери низ шега изјави: „Фала му на Бога што има Јутјуб премиум, не сакам да гледам реклами“, што предизвика бројни реакции кај публиката и на интернет.

„Го кажа тоа што сите го мислиме“, „Ќе беше пресмешно ако навистина се појавеа реклами“, „Кети од настапот на Бибер направи комедија, тајмингот ѝ беше совршен“ – беа дел од коментарите.

Инаку, Кети Пери присуствувала на концертот на Бибер заедно со својот партнер Џастин Трудо.

Бибер го започнал својот настап нешто подоцна од планираното, околу 23:25 часот, дочекан со овации од публиката, а на сцената се појавил во лежерна комбинација – кратки панталони, дуксер и очила за сонце.

Постоела и загриженост дека силните пустински ветрови би можеле дополнително да го одложат настапот, но пејачот сепак излегол на време.

На почетокот изведе понови и помалку познати песни, меѓу кои и „All I Can Take“ од 2025 година, додека најголемите хитови ги остави за подоцна во програмата.

За време на изведбата на „Speed Demon“, Бибер се осврна на медиумските шпекулации за неговото ментално здравје, пеејќи: „Се обидуваат да кажат дека сум луд, но сега го пеат секој стих“.

Во еден момент им се обрати на фановите и ги замоли гледачите на преносот во живо да предложат песни што сакаат да ги слушнат.

Во продолжение на настапот, Бибер преку лаптоп пушташе видеа од своите претходни хитови и пееше заедно со нив, вклучувајќи ги „Baby“, „Beauty and a Beat“, „Never Say Never“ и „All That Matters“. Исто така беа прикажани и стари снимки од неговото детство на Јутјуб, пред да биде откриен од Ашер и Скутер Браун.