Непријатна ситуација за градоначалникот на Тетово и лидер на Беса, Биљал Касами, се случила вчера во албанскиот град Валона, на официјалниот прием во рамките на одбележувањето на Денот на албанското знаме, 28 ноември и 113-годишнината од прогласувањето на независноста на Албанија.

На снимка која се врти по социјалните мрежи и во медиуми, се гледа како албанскиот премиер Еди Рама се движи низ толпата и доаѓа до местото на кое стои Касами, по што се поздравува со дел од луѓето кои се со него, меѓу кои и со министерот за социјална политика, демографија и млади, Фатмир Лимани.

Но, кога се очекуваше Рама да се поздрави и со Касами, албанскиот премиер целосно го изигнорира тетовскиот градоначалник и продолжи да се движи меѓу луѓето на приемот.

Во медиумите на албански јазик и на социјалните мрежи видеото покрена лавина од реакции и коментари, како и од толкувања за можните причини за игнорирањето. Дел од коментарите забележуваат дека студениот однос на албанскиот премиер бил поради блискоста меѓу Касами и косовскиот премиер Аљбин Курти, со кого Рама не е во најдобри односи. Други, пак, велат дека изгледало како Рама воопшто да не знае кои се луѓето со кои се поздравува, па многу веројатно е тој воопшто да не го познал Касами.