Откако во еден крајно драматичен меч на првиот дуел во понеделник минимално загуби македонската женска ракометна екипа, денеска во реваншот од второто коло во Европскиот куп доживеа висок пораз и елиминација.

На возвратниот дуел исто така одигран во Раман Ган во Израел составот на ЖРК Куманово загуби од составот на Макаби Аразим со 43:23.

Уште на самиот почеток од средбата се најавуваше победникот и патникот во следната фаза, израелскиот претставник поведе со 6:1, а по 10 минути игра на семафорот стоеше „плус седум“ за Макаби Аразим (9:2).

Противникот одржуваше предност од седум-осум голови разлика, а на паузата ЖРК Куманово имаше негатива од 21:13.

Ништо не се смени во вториот дел, позитивата на ривалот само растеше, во 40 минута беше високи 32:15 и до крајот на мечот само прашање беше со кој резултат ќе заврши натпреварот.

Во победничките редови девет голови запиша Хавронина, а осум голови беа дело на Лубјанаја.

На спротивната страна за нашиот претставник Алмеида Кошта имаше седум погодоци, а по четири Цветановска и Богоеска.