Денеска во 29 коло од најсилното италијанско првенство фудбалерите на Лацио на домашен терен со 1:0 успеаја да го совладаат Милан.

Стрелец на единствениот гол на стадионот „Олимпико“ во Рим беше Данецот Густав Исаксен по асистенцијата на црногорскиот интернационалец Адам Марушиќ во 26 минута од натпреварот.

Ова е чекор назад за „росонерите“ во трката за титулата и овој нивни пораз е секако добра вест за водечкиот Интер кој има 68 бодови, сега осум повеќе од Милан.

Лацио кој запиша 10 победа, втора по ред, се наоѓа на деветтото место со 40 бодови.

Во следното коло, Лацио на 22 март ќе гостува кај Болоња, додека Милан еден ден порано ќе го пречека Торино.