Камионџија загинал откако неговиот камион вчера излетал во река за време на бурата Чандра, која ја погоди Велика Британија. Полицијата на Хемпшир потврди дека возачот, маж во шеесеттите години, починал на местото на несреќата во Њу Форест, пишува Sky News.

Полицијата соопшти дека пријавата за несреќата била примена вчера нешто по 13 часот.

„Примивме пријава дека камион излетал во река кај Ringwood Road во местото North Gorley“, изјави портпарол на полицијата. „Во тек е истрага за да се утврдат точните околности кои довеле до смртта на возачот“, додаде тој.

Бурата Чандра вчера донесе обилни врнежи од дожд, поплави и сообраќајни потешкотии во бројни делови на Британија.

Поради последиците од невремето и натаму се на сила бројни предупредувања, а метеоролошката служба Met Office најавува дека нови врнежи би можеле да предизвикаат дополнителни проблеми.

Особено критично е во Дорсет, каде Агенцијата за животна средина издаде предупредување од највисок степен, кое означува опасност по животот. На жителите на едно населено место им е наредено „што е можно побрзо“ да ги напуштат своите домови.

Flooding in Dublin, Ireland this morning due to Storm Chandra…🌊pic.twitter.com/xMpkQnPB5Q

— Volcaholic 🌋 (@volcaholic1) January 27, 2026