Лос Анџелес Лејкерс ја продолжија победничката серија и ја запишаа четвртата победа по ред, откако на домашен терен ги совладаа Кливленд со 127:113, а повторно на теренот блескаше Лука Дончиќ со 42 поени и 12 асистенции.

Вечерта за Лејкерс беше успешна уште пред почетокот на мечот, бидејќи по поразот на Финикс Санс обезбедија директен пласман во плејофот.

Дончиќ, кој го пропушти претходниот натпревар против Вашингтон поради суспензија поради повеќе технички грешки, се врати на паркетот и одигра доминантно. Од игра шутираше 13/26 и по 16-ти пат сезонава постигна 40 или повеќе поени. Голема поддршка имаше од Деандре Ајтон со 18 поени и девет скокови, како и од Остин Ривс со 19 поени.

Леброн Џејмс, чиј настап беше неизвесен поради болки во левото стапало, придонесе со 14 поени. Ист број поени постигнаа и Џејк ЛаРавија и Руи Хачимура.

Кај Кливленд кој претходно обезбеди место во плејофот, најефикасен беше Џерет Ален со 18 поени. Џејмс Харден во својот прв натпревар во родниот Лос Анџелес откако на 4 февруари пристигна од Клиперс постигна 17 поени. Потфрли Донован Мичел, кој застана на 10 поени (шут 4/10), додека Томас Брајант додаде 14.