Одговорот нѐ носи во далечната 1926 година…

Владислав Ристиќ бил скопски фармацевт, трговец и еден од најбогатите граѓани на Скопје во првата половина на 20 век. Поседувал аптека и неколку дуќани во центарот на градот.

Пред речиси 100 години, според проектите на архитектот Драгутин Маслаќ, завршена е изградбата на палатата на Ристиќ на плоштадот „Македонија“, позната како „Ристиќева палата“.

Кога скопјани го прашувале:

„Господине Ристиќ, зошто градите вакво чудо, толкава палата среде Скопје?“, тој духовито одговарал: „Градам споменик за себе“.

Култната палата ги надживеа и големата поплава во 1962 година, но и катастрофалниот земјотрес во 1963 година.

Во 1929 година во палатата решил да внесе иновација – лифтот на италијанската компанија „Штиглер“. Овој лифт бил првиот во Скопје и меѓу првите на Балканот!

Лифтот бил изработен од дрво, со носивост од 320 килограми и премачкан со махагониев и ореов премаз во комбинација со лак. Вистинска своевремена атракција. Работел 80 години, до 2011 година, кога станарите на Ристиќевата палата го донирале во Музејот на град Скопје.