ВИДЕО: Чурлинов помогна за израмнување, но Шалке загуби од Карлсруе
Денеска во седмото коло од втората Бундеслига екипата на Шалке го претрпе и третиот пораз оваа сезона овојпат на домашен терен од Карлсруе со 1:2.
Македонскиот репрезентативец Дарко Чурлинов беше стартер во домашниот состав, гостите поведоа уште во првата минута со погодокот на Чои Кјунг-Рок.
Израмнувањето стигна во 15 минута кога стрелаше Тероде, таа топка дојде случајно од Чурлинов кој се обидуваше да изгради позиција за шут кон противничкиот гол.
На стартот од второто полувреме Шалке реализираше погодок преку Камински, но истиот беше поништен поради офсајд.
Веднаш откако Чурлинов ја напушти играта во 72 минута, Шалке се најде во проблеми поради црвениот картон на Палсон кој грубо го фаулираше ривалот.
Гостинската екипа го искористи периодот со играч повеќе на теренот, во 88 минута еден прекрасен погодок реализираше Ваницек за трет триумф на Карлсруе.