Фудбалерите на Бразил и на Перу обезбедија пласман во полуфиналето на Копа Америка.
Со победите над Парагвај, односно Чиле, овие две репрезентации си закажаа полуфинална пресметка.
Перу со 4:3 го совлада Парагвај во пенал рулетот, додека на „кариоките“ им беше доволен само еден гол за триумф.
Во најефикасниот натпревар на Копа Америка досега, Парагвај поведе во 11 минута преку Гомез кој само 10 минути подоцна си постигна автогол.  До крајот на првото полувреме, Перуанците направија пресврт благодарение на голот на Лападула во 40 минута.

Во второто полувреме, Парагвај дојде до израмнување со голот на Алонсо, за Јотун во 80 минута повторно да му донесе предност на Перу. За продолженија се избори Авалос кој постигна гол во последната минута од регуларниот дел.

Според правилата на Копа Америка, немаше продолженија туку веднаш се премина на изведување на пеналите. Во првите две серии, фудбалерите беа прецизни, по што во наредните три пенали голманите имаа среќа. Играчите на Парагвај, Ектор Давид Мартинез и Браиан Самудио го промашија голот, додека шутот на Перуанецот Ормеро го одбрани голманот Силва.
Потоа Тапиа од едната и Пирис од другата страна погодија, и во последната петта серија Перуанецот Куева имаше можност да ја однесе својата селекција во полуфиналето но неговиот шут го запре Силва.
Во шестата серија, Еспинола не беше прецизен за Парагвај по што Трауко погоди и обезбеди пласман во полуфиналето за Перу.
Бразил благодарение на голот на Лукас Пакета на стартот од второто полувреме дојде до победата над Чиле и си обезбеди полуфинална пресметка со Перу.

Вечерва се играат преостанатите два четвртфинални натпревари во кои се среќаваат Уругвај-Колумбија и Аргентина – Еквадор.