Црногорскиот репрезентативец Адам Марушиќ беше херој на Лацио во денешната победа од 2:1 над Сасуоло на „Олимпико“ во 28 коло од Серија А.

Десниот бек на фудбалскиот клуб од Рим постигна гол во 92 минута, кога со глава ја испрати топката во мрежата по центаршутот на Матео Канчелиери. Марушиќ ја искористи лошата реакција на голманот на гостите Муриќ, кој истрча во празно.

Ова е првиот гол на Марушиќ во првенството оваа сезона, а неговиот 16-ти во дресот на Лацио во сите натпреварувања.

Црногорскиот фудбалер беше прогласен и за играч на мечот.

Лацио поведе рано веќе во втората минута со голот на Даниеле Малдини, додека Арманд Лориенте израмни за Сасуоло во 35 минута.

По оваа победа, Лацио е на 10 позиција на табелата со 37 бода, еден повеќе од Сасуоло.